Táýelsizdik, boryshtarmyn men saǵan,

Qushaǵyńa shaqyrǵanyń úshin de.

Aralaıtyn alty qurlyq alabyn,

Esik bolyp ashylǵanyń úshin de.

Táýelsizdik, razymyn men saǵan,

Alty alashpen qaýyshqanym úshin de.

«Ógeı aǵa» kórsetkende shet qaqpaı,

Óz aǵammen tabysqanym úshin de.

Táýelsizdik, jıǵyzdyń-aý esimdi,

Buldyr tarta bastaǵanda erteńim.

Qonysymdy, órisimdi qaıtadan,

Nyq basyp óz qadamymmen ólshedim.

Táýelsizdik, berdiń maǵan qudyret,

Eı dúnıe, tyńda dara daýysymdy.

El atynan alǵa tastap sóıleıtin,

Taýyp aldym qamshymdy.

Táýelsizdik, seni jyrlap ótemin,

Óz tilimmen,óz muńymmen, dilimmen.

Óz-ózimdi kórkeıtemin men endi,

Iassaýılyq, uly Abaılyq ilimmen.

Táýelsizdik, seni qorǵaý paryzym,

Bostandyǵym, ar-ujdanym ol meniń.

Móldiregen janaryndaı babamnyń,

Móldireıdi ózenderiń, kólderiń.

Men tileımin, jeltoqsannyń yzǵary,

Júregimdi qarymasyn qaıtadan.

Etigimen sý keship er azamat,

Árýaqtaı arymasyn qaıtadan!

Men tileımin, bul mekende máńgilik,

Ot qarýlar jarylmasa eken dep.

Alakóz bop arazdasyp aǵaıyn,

Keń dalamyz tarylmasa eken dep!

Qansha janar qadaldy eken qıyrdan,

Kók týymyz jelbiregen aspanǵa.

Táýelsizdik, erteńime senem men,

Senemin men Maǵjan sengen jastarǵa!

2021 jyly jeltoqsan